ИЗ «КНИГИ ОБЛИЧЕНИЙ, ИЛИ ЕВАНГЕЛИЯ ВЕЧНОГО». Протопоп Аввакум

 

А слышит глаголы сын мой духовный — Фетька отщепенец, от никониян рукоположенец, зря на животворящий крест Господень; да буди распятый на кресте сем судия между мною и тобою, днесь и в день века. Живешь развращенно и нелепо мудрствуешь о образе святыя Троицы. Рекох ти и паки реку: веруй и исповеждь по Писанию, якоже святыя книги научают, а не по своему обольщенному смыслу. Ей, Бога тебе свидетелю поставляю и святый крест Господень!

Блудишь, сице пиша и глаголя о святей Троице: понеже-де божественное несозданное существо святыя Троицы насекомо есть и нерасстоящо лицем же до друг друга, и отнюдь не раздельно. Аз ти глаголю: возбесился еси, человече, святая сливаешь, раздельную лицы глаголеши нераздельну. Впал еси в бреге стремнины; украдше свои очи, помрачил свою душу; истинны в писании не разумевше глаголешь образ един святыя Троицы сличен; и исповедуешь, пиша в своих подметных тетрадках, с клятвою и ротою глаголя, яко Сын во Отце, та ко же и Дух Святый внутрь Отца — имут един образ, нераздельными лицы. И приводишь в приводе душу человечю, толкуя суматоху, глаголя: якож-де душа три-составна — ум, слово, дух — имать един образ, також-де и Бог: Сын и Дух Святый во Отце соединенно и совокупно, а не слитно и нераздельно всяко.

…Подобно Федьке бешенному бывал у меня в Сибири бешенный, Феодором же звали, тезоименит тебе, а другой на Лопатищах Насильем звали: на чепи сидя, У…ся, говно то свое ухватя, в рот пехает себе же, а сам говорит: царь, царь, царенки, царенки. И едино лице и два лица знаменит; понеже дьяволи так учат. Как я, мазав маслом святым, да потом шелепом свитым: твори молитву Исусову, бешенный страдник! Да бывало Христовою милостию и оцеломудрствуется недели в две, а в три и исправится. А с тобою уж десять лет мучюся, а не могу от тебя бесов тех отогнать: за моя некоторыя грехи суровы велиары в тебя вошли. Да легче беса от бешеннаго изгнать, нежели от еретика.

…Федор, веть ты дурак! как тово не смыслишь! В Писании лежит о зачатии Христове писано сице: «слухом бо вниде и неизреченно изыде». И ты, не зная силы глаголу, блекочешь, страдник: «ухом-де девыя Бог Слово во чрево ея вниде и боком изыде». Тако ты рече, Федор! Лазарь и бранил тебя за сие, а я уж на тебя и плюнул. Как о сем не знаешь? Слухом бо вниде, сиречь, со гласом архангеловым зачатся Бог Слово в девей: не разверз двери девства в воплощении, а дверьми ея вселися во утробу, а не ухом.

…Кто изрещи может сие необычное дело? От века несть слыхано, николи же, нигде же. Аще и по благовещению радишася Сиф, Енох, Исаак, Иван Предтеча и Сампсон, и Владычица наша, свет царица небесная, но отцы ложесна прежде детища разверзаху, и потом рождашеся младенец, врата разбивше. Здесь же, во Христе, не тако. Бог идеже хощет, побеждается естества чин: без болезни вниде, без болезни и изыде. И млеко дояше, дева питае питающаго всю тварь. И сие не по естеству бе, но выше естества неизреченно. Не бывает у дев млеко, дондеже с мужем во чреве не зачнет. У пречистыя Матери Господни и у Девы млеко бысть. Егда родила Бога-человека без болезни, на руках ея возлегша, сосал титечки свет наш. Потом и хлебец стал есть, и мед, и мясца, и рыбку, да и все ел за спасение наше. И винцо пияше, да не как веть мы — объядением и пианством, — нет, но благоискусно дая потребная плоти. Больше же в посте пребывая.

…Да что-су вы, добрые люди, говорите: «батько-де сердито делает. У Николы тово и не мое смирение было, да не мог претерпеть: единако Ария, собаку, по зубам брязнул. Ревнив был миленькой покойник. Не мог претерпеть хулы на святую Троицу. Собором стащили с него и чин весь: «неправильне-де творишь, архиепископ». Да ему даром дали пестрыя те ризы Христос да Богородица. И опять ево нарядили, а он себе … {пропуск рукописи} никово не бояся. Проклят блядин сын Арий да буди, — не называй тварию Творца, Сына Божия-света. За что-то меня в те поры не было. Никола бы вора по щоке, а я бы по другой, блядина сына.

…Ох, блядин сын, собака косая, дурак, страдник! Коли не знаешь в книгах силы и ты вопроси бабе поселянки: заблудил-де от гордости, государыня матушка, на водах пустыни и не знаю праваго пути к Богу. А со отцем-де своим духовным дьявол спроситца претит ми, и от него-де за воровство свое учинился проклят. Помози-де, матушка, моему сиротству, исправь мою душу косую, и весьде мой орган по души катится косо, с трудом великим, не путем еду…

 

Протопоп Аввакум икона, музей на Рогожском.

Добавить комментарий